مواقع -

اللي بدو يعرف شو يعني كربجت..ينزل على الشارع باي منطقة بعمان وبأي وقت..ويشوف شو اللي صاير ..؟

اختناقات مرورية قاتلة..

ازدحامات..انتظار بالساعات

ولو شو ما كنت ذكي انت والا العم جوجل

وحاولت تهرب لزاروبة او دخلة بين البيوت..راح تكربج وانت بتضحك كمان..

 

شو اللي سويتوه بشوارعنا يا أمانة عمان..

عارفين انه عدد السيارات في تضاعف مخيف..وبدل ما تفكروا بحل رحتوا ضيقتوا علينا اكثر بالباص الصريع( اكبر حمولة اله شفتها 10 ركاب وهو بتمختر) ..هالباص  اللي قضى على اخر احلامنا المرورية..وأكل الشوارع..

 

خلال كم سنة السيارات مستحيل تقدر  تتحرك بعمان ،  مشوار النص ساعة راح يحتاج ٣ ساعات عالاقل اذا مش اكثر..

مين اللي دمر عمان..

مين اللي خطط لهالجريمة  المرورية 

ما كانوا عارفين ودارسين انه في نمو سكاني وعمراني راح يكبر..على اي اساس وضعوا مخطط عمان الشمولي والباص..

لمتى راح نضل نعتمد نظام الفزعات في حل مشاكلنا..

بعدين بكون الشارع 6 مسارب..فجأة بصير مسربين وحيط قدامك..هاي وبعده الشتاء ما اجا..

 

من ملاحظاتي بعض رجال السير هم سبب في تفاقم الازمة في بعض المناطق وكانه قصة جكر..يعطيهم العافية على جهودهم ولكن همه كمان بحاجة لتدريب اكبر على مواجهة ازمات المرور غير المسبوقة..لانه واضح الحل مش انه يوقفوا مسرب على حساب مسرب. لانه النتيجة كارثة اكبر مش عم يدركوها.

لمتى راح نسكت عن جرائم الادارات المتعاقبة في أمانة عمان..واللي واضح سلموا رقبة العاصمة لناس ما بتفهم بشي اسمه تخطيط مستقبلي..

 

 علشان هيك..صرنا نهرب من مطب

نوقع بحفرة..

اللي بصير بشوارع عمان..هو انتحار 

لابد من إيجاد حل ذكي باسرع وقت..

لانه واضح انه عمان كربجت..وبدها ميكانيكي بفهم يصلحها..

 

عظم الله اجرك يا وطن..